Category Archives: गजल

Nepali Gazal by Nawaraj Subba

गजल

खाँदाखाँदै झुक्किएर खसेको गाँस हुँ म
सलादमा काटेर राखिएको घाँस हुँ म ।

झुकाउन खोजेको चढ्न पनि चाहेको
भीरैमा उभेको ठिङ्ग एक बाँस हुँ म ।

छुरा रैछन् बगलीमा मुखमा भने राम
हिलो पानी छुट्याउन नसक्ने हाँस हुँ म ।

पर्खिएँ जुनेलीमा बिछ्याएर आँखाहरू
बिरक्तिएर बसेको एक्लो मधुमास हुँ म ।

खाएँ हजार लात बात पाएँ उपहार
कागजमा नलेखेको एक इतिहास हुँ म ।

गजल

जाली माया लाउनुरैछ चिनो रुमाल जाली दियौ
चोखो माया लाएकोथें प्रेमी पागल गाली दियौ ।

दिलमा कतै छैन मेरो मन काट्ने कैंची हजुर
किन आकाश उधारेर बादलले टाली दियौ ।

नयनमा बग्ने आँसु नुनिला छन् भन्थ्यौ हजुर
मनको सफा तलाऊमा धमिलोपन हाली दियौ ।

सुरमा मैले ताने स्वर नाच्ने थियो पालो हजुर
परेलीका गाजल किन पखालेर फाली दियौ ।